محاورة بين الشاعرين فلاح العبيسان والشاعر صحن (قصة قصيره )

بسم الله الرحمن الرحيم

محاورة بين الشاعرين / فلاح الحميدي العبيسان والشاعر / صحن بن قويعان 

حيث أنه في عام 1956م وأثناء سيرهم في إحدى شوارع الكويت

 في منطقة كانت تعرف بالبلدية حين ذاك الوقت مبانيها من عشيش البواري 

وأصبحت الآن أسمها بالخالدية وقد صادفنا أثناء سيرنا خروج طالبات من المدرسة

 وقد طير الهواء عبائة إحداهن فجلست على الأرض وتعرضت أنا للعبائة وأحضرتها

 إليها وقمت بوضع العبائة عليها وبعد ذهابي أنا والشاعر / صحن 

تمت هذه المحاورة الشعرية ونشدت فيها هذهالأبيات:

    فــــــــــلاح

ملّ قلبن ياصحن للزين فزي***فز حرن شاف رفراف الحباري

رد صحن

يافلاح الحر شوفــه يبرا هزي ***وأنت شوفك حاضبن بيـن البواري

                                         

رد فلاح

شفّي اللي لبسها شاش وجـزي***مانبا اللي كوعها من الثوب عـاري

                                        

 رد صحن

كان مالك مع هل الديره مــغـــزي ***عط مناطيس الوحش وأخف الأثاري

                                         

رد فلاح

ياصحن في وقتي اليوم متلزي***جاريللي مع جمال الزين جاري

                                      

   رد صحن

التلزي مايفيد ولا يعزي*** أرد وأشرب لاتخاف ولا تداري

                                       

  رد فلاح

ياصحن لو شدن إيديني معـــــزي***ماألتفتنا لو تجي كل العــــــــذاري

                                         

رد صحن

دزني للي وراه الموت دزي  ***عنك والله ماأذخر الوقفه وأبــاري

لابغيت أمشي للشاعر متعب بن قميزه والشاعر فلاح العبيسان

رد الشاعر فلاح العبيسان على الشاعر متعب 

هز فكري بين الشاعر فلاح العبيسان والشاعر منوخ الحميداني

مجاراه بين الشعراء لا تصك الباب يا صاحب علي

رد الشاعر \عماش العسيلي

قصيده بين الشاعر صالح الظلماوي والشاعر فلاح

بسم الله الرحمن الرحيم

القصيده للشاعر/ فلاح بن الحميدي العبيسان الحميداني

يسندها على / صالح الظلماوي الشمري

ياراكب اللي من الميقات ناقيها***لأجل لزومي من القائد طلبناها

تسبق هبوب الذواري في مماشيها***تجلي هموم الضماير زين ممشاها

من دار نايم إبن شامي منصيها***إللي سمع صوتها بالجو لاقاها

لاجاتله من وطنا يحتفل فيها***حيثه شفوقن على خطوطي وروياها

سريرة القلب يا صالح لك أبديها***سريرة القلب ما غيرك عطيناها

أشكيلك اللي بعيداتن مناديها ***ياليتنا يابن شامي ما عرفناها

حوريةٍ بالسماء ماحدن يحاكيها***أو دينتن صاحب الأملاك خفاها

سميها كل غواص تعب فيها***كم غايصن مات تعبان برجواها

والله لو أنها بالمال لأ شريها***إما كفت تجرتي تجرتك تقفاها

لا تبتحل بالمثايل يا مسويها***لو أطمعك تبتحل فيها تركناها

رد المثل وإحترص تجهل معانيها***تراك من عيهجن تروي ضماياها

 بسم الله الرحمن الرحيم
ردالشاعر/  صالح الظلماوي الشمري
على الشاعر/ فلاح الحميدي العبيسان الحميداني

يا مرحبا بالبيوت ومن لفي فيها***ربيع قلبي أبيوت شعري ومناها

من حرف فإنِ ولام الألف وسطيها***و الحاء حكم بيها بيوت الشعر سواها

إنت البحر و المثايل لك واليها***وأنا أصخر الشعر من صخر صخرناها

وراع الصخر لازمن يتعب بتاليها***و الله أنت تأخذ من الراحه من إدناها

أطلب ونفسي معك ترخص مشاريها***الروح في واجبك ترخص وأنا أفداها

و أعرف حصة بحركم ناس تغنيها***عساك تفوز فيها عن دناياها

ماودي أبين أسمه وإنت مخفيها***تدري يها ناس ماتعرف خفاياها

إن كان بالمال تطلبنا ونعطيها***و إن كان بالجاه شوخ مطير تقواها

أم الحرايب قضت ما عاد نطريها***ما تستوي كود برضي أهله و برضاها

وإن صالفت خلها لعاد ترجيها***تلقى بداله هنوفن كنه إياها

تراك من روس قومن يفتخر فيها***أفعالها في صحاف الكتب نقراها

يوم المغازي صعيباتن معاديها***سربة حمادين ماتنطح سراياها

مجاراه بين الشاعر فلاح واخيه عبيسان

بسم الله الرحمن الرحيم

القصيدة للشاعر/ عبيسان الحميدي العبيسان أرسلها الى أخيه  فلاح الحميدي العبيسان بمناسبة مرض فلاح في 15/1/1427هـ الموافق 14/2/2006م

(عبيســـــــــــــــــــــــــــــــان)

ويشلون رجلك ياحصان الأطاليب***يامن معان الجود فعلك جمعها

لعلها تبرا كواياك والطيب***ولعل رجلك مايطول وجعها

في جاه منه يعلم الجهر والغيب***اللى وضع سبعن وسبعن رفعها

وأنه يبعدك الصدف والتسابيب***وإن جات في لطفه وعطفه منعها

أنته ليا ماطبت طبنا بلا ريب***يومن في أيديك الأمور وسنعها

ردالشاعـــر فـــــــــــــــلاح

أبشرك طبنا عسى جرحك يطيب***في جاه من دعوة نبيه سمعها

ياخوي يادرعي وستري عن العيب***اللّي ليا بانت خلولي رقعها

خلّك بها الدنيا خبير التجاريب***ويكفيك منها سترها عن طمعها

يصفق بها موج الغضب له دواليب***وكم من حصونن عالياتن شلعها

جعلك بحبل الله قوي المقاضيب***عنك البلاوي والمصايب دفعها

قصيده بين ناصر مدلج والشاعر فلاح

بسم الله الرحمن الرحيم

قصيدة موجهة إلى الشاعر/ فلاح بن عبيسان الحميداني

يا فلاح مصافق الجزر و المدي *** صار لي يا بن عبيسان ناطوري

كل ما جيت أعبر النهر و الحدي***صار قدامي محيطات و بحوري

و كل ما طقيت لي بابٍ إنلدي***مدري اللي صار لي و يش في دوري

و أنت تعرفني على الرجم أبا عدي***كل شي معتلي فيه ما موري

يا زبون الحرد يا قاهر الضدي***أنت نقبل منك الإنصاح و الشوري

و أنت تعرف غاية القلب مع ودي***يا دليلتهم ليا طفوا النوري

و أنت خابرني على النذل ما لدي***ما نرافق كود طيب و مسطوري

و الحقيرة ما يعشي ليا هدي***و من قنص بالتبع خايب و معثوري

و السيوف تقص الارقاب با لحدي***و من ضرب بنصالة السيف مثبوري

يوم أوجه يمك العلم من جدي***خابرك فاهم و واعي و دكتوري

و خابرك صندوق ما تكشف السدي***منت مثل اللي للاسرار ثرثوري

و خابر لك مع هل الطيب لك مدي***يا ولد من يسرج السرج و الكوري

مع تحيات الشاعر/ ناصر بن خالد بن مدلج
25/8/1425هـ

بسم الله الرحمن الرحيم

هذه القصيدة رد على الشاعر/ ناصر بن خالد بن مدلج المطيري

مرحباً ترحيبة محب و مودي***عد ما يكتب و يطبع و منشوري

في بـيوتن شدهن شاعرن شدي***حركن دالوب قلبي و حاشوري

و الله أني عن موقفك ما صدي***عنك مذخر يا فتى الجود مقدوري

وقت باللي مثل شرواك متردي***و صار للي قالطينٍ على السوري

لو تمد إيدين بالفعل و تردي***كان تأخذ مع هل الطيب ميسوري

كان ما ياقف يخاصمك متحدي***طايلاً شبرك على عدة شبوري

مونس مونست صابر ما هو ودي***و أنت مثلي صر صبورٍ على الجوري

ماش معنا حبال نارد على العدي***صار شرب الماء على ناس مقصوري

حظ يركب حظ و عيون تـنـسدي***مثل ماذل العرب و عد أبا الفوري

شايلن همي و همك على قدي ***ماش عن مثلك عذارن ومذخوري

أمش و أمشي معك و الحبل ممدي***أنت تأمرني و أنا عبد مأبوري

وقت هذا اليوم تقضب به الخدي***ماب هذا الوقت عقبان و صقوري

دور للي يـتبع الظل و يفدي***صايرن في وكر الأحرار عصفوري

لو يطوفه يوم ما هو متغدي***فيه تبدالك علامات و قصوري

يا بو بدر وقتـنا راح ماردي***و قــتـنا هذا به الحر مكسوري

مع تحيات الشاعر/ فلاح العبيسان الحميداني

مجاراه بين الشاعر مفرح الضمني والشاعر فلاح

بسم الله الرحمن الرحيم

قصيدة الشاعر/ مفرح الظمني المطيري

بصديقه/ فلاح بن عبيسان الحميداني

راكب اللي و أن مشى يقدح شراره***منوة اللي باللزوم مطرشينه

جيب لاندكروز مسقوف الغماره***مشترينه بالثمن من بايعينه

ما يهمه برد جوه و الحراره***صانعينه عن خرابة كافلينه

سايقه فني ماهو سواق طاره***لو يطول الخط ما يخلف يقينه

من كويت العرب عنوان الحضاره***يلفي الحقباء لشيخٍ منتوينه

عند أبو هابس مقره و اعتباره***مدهل الشجعان ذباح السمينه

كاسبٍ بالطيب عزه و أنتصاره***مانشد عن قول ناسٍ قايلينه

شيد المبنى و طول في جداره***عن عواصيف الزمان مجودينه

أشتهر بالطيب و أعلن بأشتهاره***ما قفل بابه عن اللي زايرينه

و قعوا له بأمتحانه و أختباره***بالشجاعه والكرم و أمور دينه

مثل عدٍ يعطي الماء بالغزاره***ما نشدجمه عن اللي قاطنينه

جاذبه عودٍ رقا راس الزباره***ينطح الشجعان ويفك الضعينه

تبعه عوص النجايب في مزاره***كم قطيعٍ بالفلاة أمصبحينه

قلتها من قلب و أعلنها جهاره***يا عسى يبطي وتبطي به سنينه

من زرع زرعٍ يبا يجني ثماره***ما خسرنا زرعنا اللي زارعينه

يا فلاح أيامنا فيها أستداره***يوم ترحمنا و يومٍ مستهينه

أن زعلنا وقتنا عوّر عواره***و أن سكتنا حكم ربي مرتضينه

يا عشير مدللٍ يطوي جماره***ما هوت غيرك وبالمذهب حصينه

خل فيك من الدهر عزم و جباره***ما كتب لك جاك من زينه و شينه

دام خط الطيب ماشن بك قطاره***لا تسمّع هرج شنين الرّطينه

والله إنك غالي والعلم أشاره***وافيٍ قدرك وحنا حافطينه

لا يصيبك شك يا مخثر بهاره***الليال طوال و الرفقه متينه

بسم الله الرحمن الرحيم
القصيده من كلمات الشاعر/ فلاح بن الحميدي العبيسان الحميداني المطيري
مهداة لصديقه الحميم/ مفرح الضمني المطيري.... الموقر

يا مفرح جيتني عجل الزياره***وجبت عذر  وقلت عذرك قابلينه

لك ترى ماني بهاب من الخساره***كل غالي لجل غالي مرخصينه

جعل يفدونك منقبت الجحاره***كل درب فيه طيب مجنبينه

يا بو فيصل ياسند ضيفه و جاره***يا رفيقن طيب فعله خابرينه

أخذن بالطيب لك تسعين غاره***ما أكتفيت بطيب ورثن كاسبينه

أخذن طيبك بيمناك ابمهاره***و الرفيق برفقتك مالن يدينه

يوم بعض الناس رفقتهم عياره***رفقته مثل السراب لواردينه

و أنت رفقتك الوفا فيها شعاره***رفقتك فيه الوفا لمدورينه

الرفيق برفقتك يلقى وقاره***معه في جاهك ومن مالك تعينه

ما تغير عن هوى رابعه مساره***مفرح الظمني خذا الطيب بيمينه

بين إبن ضمنه و بين أخوان ساره***بالفعول وبا لأيدين مشبحينه

معه رفقة عمر ماشفنا غياره***دايمن جديد و الرفقه ثمينه

أخذان طيبه ومن راسه قراره***ما عليه من الضعوف وحاسدينه

لي رفيق ورفقته عندي تجاره***و عند ناسن رافقوه و عارفينه

دوم ما تطفي عن الماجوب ناره***و النشاما كل ساعه ناحرينه

ومجلسن من طاعة المولي عماره***و هله من كل خير معمرينه

يارفيقن ما خلط حلوه مراره***فيه من صاف الذهب و الماس عينه

صافي الرفقه وفعل الطيب كاره***ما يطلع جاهل المبدأ خزينه

يابو فيصل صاحبك طال إنتظاره***باغين سمرة خدينن مع خدينه

يوم نسمر و القلوب بها طهاره***و من حضرنا يا ثنين مونسينه

يوم يمضي الليل ساعة من نهاره***والسنه بحساب ليلن سامرينه

عندنا الدنيا مثل قطف السجاره***ولا حسبنا المال ناسن جامعينه

يوم نرمي بالصحن راس وفقاره***و ماكسبنا بالأيدين مقلطينه

ليا لفا ضيفن نبشربه بشاره***يا حلو هكا الزمان و عايشينه

يوم عشب الوسم نركض مع خضاره***كم زهورن من زهورن قاطفينه

إنتهت وتعيش يا نمر النماره***كل وقتن له لباسن لابسينه

قصيدة بنت البادية ورد الشاعر للقصيده

بسم الله الرحمن الرحيم

هذة القصيدة للشاعرة الملقبه بنت البادية بالسبعينات

يا من الدنيا و سر الكون بيده***دعوة المظلوم عندك مستجابه

خافي الأنسان تبديه العقيده***حجته تبطل و تنجح من جوابه

ربي إنك تطلقه و تحل قيده***و احدن صارت على روحه إطلابه

كيف يبلى شخص شخصن ما يريده***ظالمن يملك حياته بإغتصابه

يحرم المسكين و الدنيا سعيده***و يحرم المخلوق من متعة شبابه

المشاكل في مناطقنا عديده***ليه ما يوضعلها حد و رقابه

قصتي كتبتها ضمن القصيده***من قرا مضمونها كله غرابه

أنشروها بالمجلة و الجريده***و أخفوا إسمي لا يحسون القرابه

والدي طماع و أمي مستفيده***تعبد الدينار و تكرر إحسابه

جوزوني شخص نفسي ما تريده***تكرهه نفسي و قلبي ما رضابه

كُبر جدي و إشتراني من رصيده***و أنتهى راي العصابه بإنتخابه

إن بكيت و صحت قالولي عنيده***و إن سكت أدخلت نفسي في عذابه

هل ترون أعيش بالدنيا و حيده***و أتريح لا زواج و لا غرابه

عيب أشوه سمعتي و أصبح نكيده***عندي السم الحمر يسهل شرابه

بسم الله الرحمن الرحيم
رد الشاعر/ فلاح بن الحميدي العبيسان الحميداني على بنت الباديه

يأهل المعروف أنا جتني نشيده***من بنات البادية فيها عتابه

تشتكي من كيد أبوها و تهديده***شايبن جود طواريق الخيابه

بنت كان أبوك له نفسن زهيده***كيف مالك مع هل المعروف لابه

ما طلع من لا بتك قرمن وليده***يوم جاك الضيم بيته ينلجابه

ليا وقف دونك له العالم شهيده***و معه نعلن بالحزابه و الحرابه

الرجال اللي لها راي و عقيده***عندهم بيع البنات من العيابه

الرجل بيعه لبنته ما يزيده***و لا حدن من بيع بنته جاه ثابه

و أسمعي بالراي كان إنك رشيده***ميزي بين العمار من الخرابه

و أستشيري معي أهل راين سديده***كود معيه يتفق رمي الاصابه

الكبار فعولها دايم مجيده***مع كبار السن تلقين الحبابه

كان زوجك له مواقيفن حميده***كبر سنه لا يعيفك ابجنابه

بعض الشيبان بالوده حديده***عند شدات الليالي ينغزابه

و بعض الشبان صيده من يصيده***كنه أخته مير فارقته ثيابه